آتش سنڌي
رياضت ٻرڙو
آتش سنڌيءَ جو شمار مزاحمتي ۽ قومي
شاعرن ۾ ٿئي ٿو، جڏهن ته ميٺ محبت واري شاعري پڻ سرجي اٿائين. هُو سڄيءَ سنڌ ۾
مشهور آهي. سندس ڪيترائي ڪلام ريڊيي تان نشر ٿيڻ سميت، آڊيو ڪيسٽن ۾ پڻ نامور
فنڪارن پاران ڳايا ويا آهن.
آتش سنڌيءَ جو ڇٺيءَ نانءُ معشوق
علي آهي. هُو ۱۷ جولاءِ ۱۹۵۳ع تي قنبر جي علي خان محلي ۾، ولي محمد شيخ جي گهر ۾،
پيدا ٿيو. غربت سبب پرائمري تائين تعليم حاصل ڪري سگهيو. محنت مزوري ڪري گذر سفر
ڪري پيو.
۱۹۶۷ع ۾ آتش سنڌيءَ شاعري شروع
ڪئي. شاعريءَ ۾ استادُ، مشهور عوامي شاعر پيرل قنبر اٿس. شاعريءَ جي لڳ ڀڳ سڀني
صنفن ۾ آتش سنڌيءَ لکيو آهي. کيس شاعريءَ جي مڃتا ۾، مهراڻ يونيورسٽي ڄام شوري
پاران، يادگيري طور، ڪَپ ڏنو ويو. هن ۱۹۸۰ع ۾ لطيف ادبي سنگت قنبر قائم ڪئي، جا ۱۹۸۲ع
تائين سرگرم رهي. ۱۹۸۲ع ۾ هُو سنڌي ادبي سنگت (س.ا.س.) يونيورسٽي شاخ جو ميمبر ۽ ۱۹۸۸ع
۾ س.ا.س. قنبر جو ميمبر ٿيو، جيڪا رڪنيت ۱۹۹۴ع ۾ ختم ٿيڻ کان پوءِ، س.ا.س. قنبر جو ٻيهر ميمبر ۱۹۹۹ع ۾ ٿيو. هُو ۱۹۹۹ع ۾
مئي کان ڊسمبر تائين سيڪريٽري، ۲۰۰۰ع ۾ ڪائونسلر ۽ ۲۰۰۳ع ۽ ۲۰۰۴ع ۾ ميمبر ڪاروباري
ڪاميٽي رهيو آهي. هُو ڊاڪٽر محبت اڪيڊمي قنبر جو ميمبر (۲۰۰۰ع) ۽ ميمبر ڪاروباري
ڪاميٽي (۰۱-۲۰۰۰ع) رهيو. سياسي طور آتش سنڌي، جيئي سنڌ تحريڪ سان ۱۹۷۸ع کان وٺي
لاڳاپيل آهي. آتش سنڌيءَ جي رهائش علي خان محلي ۾ آهي.
No comments:
راءِ ڏيندا