محمد حاڪم خاصخيلي

محمد حاڪم خاصخيلي

سندس وڇوڙي تي

عوامي آواز ايڊيٽوريل

ڪجهه ڏينهن اڳ وڇڙي ويل صحافي محمد حاڪم خاصخيلي منهنجو پراڻو دوست ۽ ساٿي ھو. اسان ڊي سي هاءِ اسڪول نوابشاھ جي هڪ ئي“ بي” ڪلاس ۾ پنجين کان ڏھين ڪلاس (مئٽرڪ) تائين گڏ پڙھياسون. مون کي اڄ به ياد آھي ته هو ٻڌائيندو ھو ته سال ۱۹۵۰ جي پيدائش آھي، اھڙي ريت سندس ڄمار اٽڪل ۷۱ ورھيه ھئي. مونکي سمجھه ۾ نٿو اچي ته پريس ڪلب وارن سندس ڄمار ۸۵ ورھيه ڇو لکي آھي؟ اھو ياد اٿم ته گھڻو پوءِ هن شڪايت ڪئي ھئي ته سندس ڀاءُ مير محمد جي ڄمار شناختي ڪارڊ وارن وڌيڪ لکي ھئي ۽ شروع ۾ ڪوششن جي باوجود به ٺيڪ نه ڪري سگھيا. بھرحال، اھو ٿي سگھي ٿو ته سندس ڄمار به وڌيڪ لکيل ھجي.

نوابشاھ ۾ مان غريب آباد پاڙي ۾ رھندو هوس ته دوست حاڪم ھر ڏھاڙي اچي ملاقات ڪندو ھو.

مون کي جنرل يحى خان جي دور ۾ ريڊيو پاڪستان، سنڌي نيوز، ڪراچيءَ ۾ باقاعدي نوڪري ملي ته مان پي آءِ ڊي ڪالونيءَ ۾ رھندو هوس. حاڪم ڪراچي ايندو ھو ته مون سان گڏ رھندو ھو. بھرحال، ساڻس رابطو گھٽ يا وڌ آخري دم تائين رھيو.

مان ڪڏھن ڪڏھن نوابشاھ ويندو ھوس ته پريس ڪلب ۾ به ساڻس ملندو ھوس. منهنجو نوابشاھ ۾ به صحافت سان پراڻو واسطو هو. ريڊيو پاڪستان جي سنڌي نيوز ۾ باقاعدي ملازمت ملي ته ڪراچي آيس. پوءِ، شھيد ذوالفقار علي ڀٽي، روزاني هلال پاڪستان حيدرآباد کانپوءِ الڳ ايڊيشن ڪراچيءَ کان ڪڍيو ته مونکي ڪراچيءَ ۾ سب ايڊيٽر رکيو ويو. اٽڪل ۵ ورھين کانپوءِ پي آءِ اي ۾ پي آر او مقرر ٿيس ته منهنجو واسطو ميڊيا جي سڀني اخبارن سان هو.

اصل ۾ حاڪم خاصخيليءَ کي به، مون کي صحافت ۾ ڏسي صحافت جو شوق جاڳيو. روزاني عوامي آواز ۾ نمائندي ٿيڻ جو کيس شوق ٿيو ۽ مونکي چيائين ته مان عوامي آواز جي مالڪ ۽ پنهنجي پراڻي دوست ڊاڪٽر عبدالجبار خٽڪ کي چئي کيس باقاعدي نمائندو مقرر ڪرايان ۽ مون ايئن ئي ڪيو. حاڪم آخري دم تائين انهيءَ اخبار جو نمائندو رھيو. اھا سچائي آھي ته مان گذريل رات رات جو اوچتو گھڻو پريشان ھوس، ظاھري طور پريشان رھڻ جو سبب ڪوبه سمجھه ۾ نه آيو سو پريشاني دور ڪرڻ لاءِ ليپ ٽاپ کوليم ته سندس موت جي خبر پڙھيم. ھونئن به مان ھر جمعي تي گذريل ڇھن ورھين کان هڪ اخبار ۾ ڪالم لکندو آھيان، اصل ۾ ڪالم ۱۹۶۷ کان لکڻ شروع ڪيا ھئم. سندس موت جي خبر پڙھي، مان بي چين ٿي ويس ۽ ڏاڍو ڏک ٿيو جنهن جو ڪارڻ اھو آھي ته ساڻس ۶۵ ورھين کان دوستي ھئم. پراڻيون کوڙ يادگيريون بار بار ياد اچڻ لڳيون. اڃا به سندس جدائيءَ تي پريشان آھيان. نوابشاھ پريس ڪلب طرفان پريس ڪلب جي نائب صدر حاڪم علي خاصخيلي جي لاڏاڻي تي ۳ ڏينھن سوڳ ملھائڻ جو اعلان ڪيو ويو آھي.

 

(ڏھاڙي عوامي آواز ڪراچي ۾ ۲ فيبروري ۲۰۲۱ع تي ڇپيل)